Kreppan læðist

Fyrstu þrjá mánuði eftir bankahrunið heyrði maður oft fólk utan Stórreykjavíkursvæðisins fullyrða að það væri engin kreppa hérna, góðærið var aldrei á landsbyggðinni.

En nú finnst manni hún kreppa kerlingin vera að læðast að okkur hérna í uppsveitum, maður heyrir menn úr verktakabransanum tala um að verkefni sem þeir töldu sig geta gengið að vísum fram á vor hafi verið falin fjölskyldumeðlimum sem hafa misst vinnuna á höfuðborgarsvæðinu.

Kannske við sjáum aftur fagfélögin berjast fyrir því að menn af viðkomandi svæði sitji fyrir um vinnu þá sem er að hafa. Hvernig er það er það ekki bannað samkvæmt ESB samningnum, mega ekki allir vinna allsstaðar á ESB svæðinu.

Bara að Alþingi fari nú að drífa í því að samþykkja frumvarp um endurgreiddan virðisaukaskatt af viðgerðum og viðhaldi húsa þó að það dragi skammt ef það á aðeins að gilda fram í júní og kannske að hanga í þinginu ósamþykkt fram yfir kosningar.  

Það er erfitt að vera bjartsýnn í öllu þessu bölmóðstali alla daga í fjölmiðlum.

Sumir hafa alveg hætt að horfa og hlusta á fréttir.

Ágætu fjölmiðlamenn viljið þið vera svo vænir að hafa 50% góðar fréttir alla daga þær eru til ef þið talið við rétta fólkið þetta ástand fer svo illa með geðheilsu fólks.

Við íslendingar erum vön að bjarga okkur út úr svona vandræðum þó að þau hafi sjaldan verið af stærri gráðu en núna og hvað erum við bættari með að vita nákvæmlega hverjum er um að kenna nema til þess að vita hvað við eigum ekki að kjósa næst.  

Að lokum, Valentínusardagurinn er greinilega á næsta leiti, til allrar hamingju bættist enn einn skyldu blómagjafadagur við  svo að garðyrkjubændur hafi meiri sölu og við getum glaðst yfir fegurð blómanna.Í tilefni þess lítið ástarljóð.

Ástin

Haltu ástinni

mjúklega í höndum þínum

leyfðu henni að flögra

sem litfögru fiðrildi

því ef þú heldur fast

kremur  þú vængi hennar

og hún getur ekki flogið meir

og deyr.

 

Haltu ástinni

mjúklega í höndum þínum

sem nýorpnu eggi

því ef þú heldur fast

brotnar skurnin

og hún rennur

milli fingra þinna

og hverfur.    

Athugasemdir

[Offari, 13.2.2009 kl. 16:56]

Er ekki hægt að einangra kreppuna á höfuðborgarsvæðinu. Landsbyggðin hefur enga þörf fyrir kreppu.